Er art de governar se fondamente ena capacitat de compréner e respóner as besonhs e es aspiracions d’ua comunautat. En aguest sens, assolidar er autogovèrn d’Aran ei era garantia entà qu’era nòsta ciutadania dispòse des recorsi e servicis publics qu’a de besonh e merite. Mès aguest non ei er unic rèpte qu’a eth nòste territòri, se plan ei cèrt que resulte ua pèça clau.

Era Val d’Aran compartís tanben rèptes damb era rèsta deth Pirenèu qu’an a veir damb era atencion as persones e damb assegurar que se placen en centre des accions, per exemple, en matèries tan importantes coma era sanitat e era educacion, es comunicacions digitaus e terrèstres, era diversificacion economica, era retencion deth talent e era igualtat d’oportunitats. E era pèça clau d’aguesti rèptes compartidi ei, sense dubte, era inversion publica qu’aguesti territòris auem recebut pendent decènnis. En cas d’Aran, pendent es dus mandats qu’eth PSC governèc ara Generalitat, recebec es inversions mès nautes dempús des ans ueitanta, maugrat açò, pendent toti es ans de govèrns de Convergéncia/Junts e ERC, era inversion en Aran a estat negativa, en tot arribar en -89’5%, çò qué hè ua mieja de -3.803’59€ per abitant e an.

Ei pr’amor d’açò qu’un des compromisi qu’eth PSC presente entad aguestes eleccions en Parlament ei era d’actualizar aguest deficit d’inversions, en tot centrar-se en inversions en comunicacions, abitatge, cultura e sanitat.

Es infraestructures son eth teishit que connècte es comunitats e impulse eth sòn desvolopament. En aguest sens, er impuls d’un plan integrau entà melhorar era carretèra C-28 e eth bastiment d’un centre culturau son inversions que non sonque melhoren era foncionalitat e era seguretat deth territòri, se non que tanben enfortissen eth teishit sociau e culturau dera Val d’Aran. Ath delà, era modernizacion der Espitau Vau d´Aran ei ua mòstra clara deth compromís damb era salut e eth benèster des abitants d´aguesta zòna deth Pirenèu.

Er accès a un abitatge digne e assequible ei un dret fonamentau qu’a d’èster garantit. Er abordatge decidit d’aguesta problematica ena Val d’Aran, damb eth traspàs de competéncies e recorsi ath Conselh Generau d’Aran, ei un pas ena direccion corrècta.

A despièch des retoriques, es govèrns de Junts e ERC pendent es darrèri ans, an mancat ara ora de respóner as problèmes reaus qu’afècten as aranesi. Era manca de desvolopament e desplegament dera lei d’Aran ei un clar exemple dera sua negligéncia envèrs aguesta comunautat. En lòc de centrar-se enes besonhs locaus e enfortir er autogovèrn, an priorizat d’auti ahèrs politiques e ideologics que, maugrat èster respectables, an deishat de costat es preocupacions deth pòble aranés.

Eth Partit des Socialistes de Catalonha damb Salvadora Illa ath capdeuant, a un compromís clar: centrar-se enes problèmes reaus e urgents que preocupen as aranesi. Méter enfasi en desvolopament der autogovèrn, era melhora des infrastructures e era assegurament d’abitatges dignes entà toti. Ei ora de méter fin ara negligéncia deth passat e trabalhar activaments entà melhorar era qualitat de vida deth pòble aranés.