Partit dels Socialistes de Catalunya
Menú intern:Os valores do socialismo
Els valors del socialisme - Gallec
O PSC é depositario duns valores que forman parte da tradición política da Revolución Francesa e do socialismo democrático: os valores da liberdade, a igualdade e a solidariedade.
Os socialistas pensamos que unha boa política ten que proporcionar unha lóxica explicativa ao que se fai, ten que sinalar un obxectivo para cumprir e ten que debuxar un camiño de reformas para conseguilo. Ten que estar guiada, polo tanto, por uns valores que lle dean sentido á súa acción, configurando un relato sen o cal non hai POLÍTICA alén das políticas.
Escull un idioma
Estes son os valores que guían o noso pensamento e a nosa acción e que se contrapoñen aos privilexios, ás desigualdades e ao individualismo insolidario. Son estes valores os que lle dan sentido ao proxecto que defendemos e os que nos identifican como un actor diferenciado e con perfil propio na vida colectiva; uns valores que teñen plena vixencia e que nos serven para formular, comunicar e aplicar a nosa acción política, co fin de lles dar respostas aos problemas da xente.
O noso socialismo é un ideal de valores colectivos que pretende conseguir e asegurar a plenitude individual e o benestar colectivo da sociedade, unha sociedade na que o progreso científico e técnico e o desenvolvemento económico sexan instrumentos para o desenvolvemento social, cultural e individual; unha sociedade na que ninguén se sinta discriminado ou marxinado por razóns de orixe social ou étnica, sexo, estado físico ou mental, orientación sexual, relixión ou ideas políticas.
Vivimos un momento histórico no que conviven enormes posibilidades de resolver vellos problemas, con novos interrogantes, novos retos e a aparición de novas desigualdades. Polo tanto, convén actualizar o socialismo democrático dándolles un sentido novo aos nosos valores.
En primeiro lugar, a liberdade: reivindicamos un concepto de liberdade ligado á responsabilidade cívica e ao compromiso coa sociedade, unha liberdade inseparable do compromiso coa democracia e unha democracia baseada na utilización de instrumentos colectivos útiles e eficaces para os cambios sociais e políticos.
En segundo lugar, a xustiza e a igualdade: propoñémonos non só garantir a igualdade de oportunidades, senón crear unha sociedade das oportunidades para todos a partir de políticas activas de igualdade. A xustiza é o fin de toda discriminación contra os individuos e a consecución da igualdade de dereitos e oportunidades.
E, por último, a solidariedade: queremos darlle sentido ao concepto de sociedade como redistribuidora de riquezas e oportunidades en todos os ámbitos e niveis da Administración pública. E para facelo propoñémonos fortalecer e flexibilizar estas administracións para dotalas de maior capacidade de adaptación ás novas necesidades sociais.
Partit dels Socialistes de Catalunya (PSC-PSOE) - Nicaragua 75-77 - 08029 Barcelona - 93 495 54 00 - www.socialistes.cat - Publicació digital controlada per Nielsen/OJD